གནམ་ལོ་གསར་ཚེས་ལ་བཀྲ་ཤིས་བདེ་ལེགས་ཞུ།
  ཤེས་རིག་ནོར་བུའི་སློབ་གླིང་གིས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2022 ལོའི་ཟླ 6 ཚེས 27 རེས་གཟའ་ཟླ་བ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» གཙོ་ངོས།» མཐར་ཕྱིན་འོས་སྦྱོར། »གནམ་ལོ་གསར་ཚེས་ལ་བཀྲ་ཤིས་བདེ་ལེགས་ཞུ།
གནམ་ལོ་གསར་ཚེས་ལ་བཀྲ་ཤིས་བདེ་ལེགས་ཞུ།
རྩོམ་སྒྲིག་པ།  བན་ཤུལ་འཇམ་དབྱངས་ཡེ་ཤེས། སྤེལ་དུས 2021-02-11ལྟ་ཀློག (3599)རྩོམ་ཁུངས: ངེད་དྲ་བ།པར་འདེབ།

རབ་གནས་ལྕགས་མོ་གླང་གི་ལོ་སར་ཡག

ལྡོང་ཡོན་ཏན་རྒྱ་མཚོ།


དཀོན་མཆོག་གསུམ་གྱི་ཐུགས་རྗེ་འོད་དུ་འཚེར།།
ལྷ་དང་བླ་མའི་བྱིན་རླབས་ཆར་དུ་བསྙིལ།།
ཡི་དམ་ཆོས་སྐྱོང་འཕྲིན་ལས་གློག་བཞིན་འཁྱུག།
རབ་གནས་ལྕགས་མོ་གླང་གི་ལོ་སར་ཡག།


མངའ་རིས་སྐོར་གསུམ་བདེ་དགའི་དཔལ་གྱིས་འཚོ།།
དབུང་གཙང་རུ་བཞི་སྟོབས་འབྱོར་མངའ་ཐང་རྒྱས།།
མདོ་ཁམས་སྒང་དྲུག་ཁ་ལས་ཀླུང་རྟ་དར།།
རབ་གནས་ལྕགས་མོ་གླང་གི་ལོ་སར་ཡག།


གཞིས་བྱེས་གཉིསའཛོམས་སེམས་ཀྱི་མུན་པ་སེལ།།
བླ་སློབ་དགྱེས་འཛོམས་དམ་པའི་ཆོས་ཆར་འབེབ།།
ཆོས་རིག་དཔལ་འབྱོར་ཡར་ཟླའི་འཕེལ་ཁར་འགྲན།།
རབ་གནས་ལྕགས་མོ་གླང་གི་ལོ་སར་ཡག།

སྙན་པའི་གྲགས་དཀར་གཡུ་འབྲུག་ཇི་བཞིན་ལྡིར།།
རིགས་ཞེན་དཔའ་སྤོབས་ཁྱུང་ཆེན་ལྟ་བུར་འཕྱོ།།
བདེན་པའི་གད་རྒྱངས་སེང་སྟག་བཞིན་དུ་སྒྲོག།
རབ་གནས་ལྕགས་མོ་གླང་གི་ལོ་སར་ཡག།


སྐད་ཡིག་སློབ་གསོའི་ལས་དོན་མཚོ་ལྟར་རྒྱས།།
གནའ་དེང་རིག་པར་བརྩོན་པའི་གོམ་སྟབས་མྱུར།།
རྒྱུ་འབྱོར་ལོངས་སྤྱོད་རྣམ་སྲས་མཛོད་ལས་མཐོ།།
རབ་གནས་ལྕགས་མོ་གླང་གི་ལོ་སར་ཡག།


དབུ་དཀར་རྒན་པ་རྣམས་ཀྱི་སྐུ་ཚེ་རིང་།།
གཟུགས་མཛེས་ན་གཞོན་དག་གི་ཁ་ལས་དགེ།།
ལོ་ཆུང་བྱིས་པ་མང་བོས་གཡང་ཁྱིམ་གང་།།
རབ་གནས་ལྕགས་མོ་གླང་གི་ལོ་སར་ཡག།

གཡང་གི་སྒོ་བཞིས་རི་ལུང་ཤོད་གསུམ་ཁྱབ།།
བཏབ་པའི་ལོ་ཏོག་སྨིན་ཞིང་རྩི་ལྗོན་རྒྱས།།
རིན་ཆེན་དབང་གི་རྒྱལ་བོའི་གཏེར་ཁ་བརྡོལ།།
རབ་གནས་ལྕགས་མོ་གླང་གི་ལོ་སར་ཡག།


རྐང་གཉིས་མི་ལ་ཚེ་ཡི་བཀྲ་ཤིས་ཤོག།
རྐང་བཞི་ཕྱུགས་ལ་གཡང་གི་བཀྲ་ཤིས་ཤོག།
ཟས་དང་ནོར་ལ་བཅུད་ཀྱི་བཀྲ་ཤིས་ཤོག།
རབ་གནས་ལྕགས་མོ་གླང་ལོར་བཀྲ་ཤིས་ཤོག།

  ༢༠༢༡-༢-༡༢


ལོ་སར་ལ་བཀྲ་ཤིས་བདེ་ལེགས།

འཇིགས་མེད་རྡོ་རྗེ།


དམ་ཆོས་ཉི་མ་འོད་པོ་ཆེ།།

ལུང་རྟོགས་གདམས་པའི་མཛོད་འཆིང་པ།།

འཕགས་མཆོག་སྤྲུལ་བའི་གར་བསྒྱུར་མཁན།།

སྨྲ་བའི་དབང་བོ་གཙུག་གིས་བསྟེན།།


ལྟ་བ་རྟེན་ཅིང་འབྲེལ་འབྱུང་བ།།

སྤྱོད་པ་འཚེ་མེད་ཞི་བདེའི་ལམ།།

ལས་འབྲས་བསླུ་མེད་སྐྱབས་ཀྱི་མཆོག།

བདག་གི་བཤེས་ཁྱེད་ཕྱག་གི་ཡུལ།།


འཆད་ལ་ཐོག་མེད་སྨྲ་བའི་སེང་།།

རྩོད་ལ་འགྲན་མེད་རིག་པའི་བུ།།

རྩོམ་ལ་དབྱངས་ཅན་ངག་གི་དཔལ།།

ང་ཡི་བླ་མ་སྐྱོབ་པའི་མགོན།།

      གནམ་ལོ་གསར་བའི་དུས་བཟང་ལ་སྐུ་ཚེ་རྒྱལ་མཚན་བརྟན་ཞིང་ཐུགས་བཞེད་ཡིད་བཞིན་འགྲུབ་པའི་བཀྲ་ཤིས་སྨོན་ཚིག་དང་བཅས་སློབ་འབངས་ཡོངས་ཀྱི་གྲལ་མཐའ་བ་སྨན་དམིགས་བུའམ་འཇིགས་མེད་རྡོ་རྗེ་རུ་འབོད་པས་གུས་ཕུལ།


ལོ་སར་ཤིས་ཚིག་དུང་གི་སྒྲ་དབྱངས།

 

                སྨར་ཁམས་པ་པད་དཀར་འབངས་ཀྱིས།


རྡུལ་དམར་བྱུགས་པའི་ཉི་གཞོན་འཛུམ་པ་དབང་ཕྱོགས་རི་ནས་ཚེས་པ་ཡིས། །

གླིང་བཞིའི་མཁའ་ཡི་པགས་པ་འཐུག་པོ་འོད་ཟེར་དྲ་བས་དྲས་པ་བཞིན། །

གྲུ་འཛིན་རི་ཡི་སྤོ་ལ་འགྱིང་བ་འཕྲོག་བྱེད་དཀར་བོའི་ངར་སྐད་ཀྱིས། །

སྲོག་གནས་མྱོས་པའི་མི་བསྲུན་ཡིད་ལ་འཇིགས་བརྒྱ་སྟེར་བའི་དགེ་ལེགས་བཀྱེས། །


ལེགས་བྱས་དེ་ཡིས་ཁ་བའི་མེ་ཏོག་རྐང་བར་བཀོད་པའི་རིགས་ཅན་གྱི། །

དཔྱོད་ལྡན་རྣམས་དང་དཔུང་བ་སྐྱེས་དག་དཔལ་དང་གྲགས་པས་རྒྱགས་པ་དང་། །

ལོ་མང་ཁུར་བའི་སྲོག་གི་ཀ་བ་བྲག་གི་ཁོང་གསེང་ལ་བཅོལ་ནས། །

ལང་ཚོའི་མཛེས་ལྡན་གཞོན་ནུའི་ཚོགས་ཀྱིས་རང་རིགས་སྲུང་བའི་ཚུགས་ཐུབ་ཤོག །


མུ་ཁྱུད་ལྟ་བུའི་ཀེ་ལ་ཤ་ཡང་རང་མདངས་དཀར་བོ་མ་ནོགས་ཤིང་། །

འགྱུར་སྐད་སྙན་པའི་ནགས་མའི་ཀླུང་ན་གཡུ་ཡི་ཡལ་ག་འབྲས་བུས་དུད། །

ཤོད་ཀྱི་སྤང་ལ་གནག་ཕྱུགས་ཁྱབ་པ་སྤྲོ་དགའི་ཡོ་ལང་དར་བ་ཡིས། །

ལྕགས་གླིང་ལོ་ཡི་ཟླ་བའི་ཕྲེང་བ་བཀྲ་ཤིས་སྟོང་གིས་འཕྱུར་བར་ཤོག །


གནམ་ལོ་གསར་བའི་སྨོན་ལམ་གཙང་མ།

 

ཀླུ་བློ་དར།


སྒྲིབ་གཉིས་ཀུན་སྤངས་ནམ་མཁའི་ཁྱོན་ཡངས་པོར།  །

ཤེས་བྱ་ཐམས་ཅད་མངོན་སུམ་ཡུལ་དུ་གནས།   །

ཇི་ལྟ་ཇི་རྙེད་མཁྱེན་པས་འགྲོ་བའི་མགོན།  །

རྐང་གཉིས་གཙོ་བོ་ཁྱོད་ལ་སྐྱབས་སུ་མཆི།  །


ཐུབ་པའི་བསྟན་པ་ཡུན་རིང་གནས་པ་འདི།  །

བསྟན་འཛིན་སྐྱེས་བུ་རྣམས་ཀྱི་བཀའ་དྲིན་ཡིན།  །

ཀླུ་སྒྲུབ་ཐོགས་མེད་ཟླ་བ་གྲགས་པ་སོགས།  །

རྒྱ་གར་པཎ་གྲུབ་རྣམས་ལ་གུས་པས་འདུད།  །


བོད་ཡུལ་མུན་པའི་གླིང་འདིར་སྒྲོན་མེས་སྒྲོན།  །

དམ་ཆོས་འོ་མཚོ་བོད་པའི་ཡུལ་ནས་འཁྱིལ།  །

ལམ་སྒྲོན་ལམ་རིམ་ལ་སོགས་རིམ་གྱིས་མཛད།  །

བཀའ་གདམས་བླ་མ་རྣམས་ལ་གསོལ་བ་འདེབས།  །


སྔོན་བྱུང་མཁས་པའི་མཛད་རྣམ་ཇི་བཞིན་དུ།  །

རྗེས་འཇུག་སློབ་མའི་ཉམས་ལེན་ལེགས་པར་མཛད།  །

དད་པའི་ཨ་ལོང་གཡོ་མེད་ལྷུན་པོ་བཞིན།  །

རྒྱུད་པའི་བླ་མ་རྣམས་ལ་ཕྱག་འཚལ་ལོ།  །


སྙིགས་དུས་དམ་ཆོས་ལས་སུ་མཛད་པ་འདི།   །

བྱང་ཆུབ་སེམས་དཔའ་ཡིན་པའི་རྟགས་སུ་ངེས།  །

ཉིན་མཚན་དབྱེར་མེད་ལས་ཀྱི་མཛད་པ་མཆོག  །

སྨྲ་མཁས་བཤེས་གཉེན་རྣམས་ཀྱི་ཞབས་ལ་འདུད།  །


སྲོག་ལྡན་སྐྱེ་འགྲོ་བཟང་ངན་ཐམས་ཅད་ཀྱང་།  །

སྔོན་བསགས་ལས་ཀྱི་བཀོད་པ་སྣ་ཚོགས་ཀྱིས།  །

ལུས་སྦྱིན་མཁན་དང་འབྲེལ་མེད་གཅིག་ཀྱང་མེད།  །

དྲིན་ཆེན་ཕ་མའི་བཀའ་དྲིན་མཚུངས་ཟླ་གྲལ།  །


ཡོངས་ཀྱིས་བཀུར་བའི་འགྲོ་བའི་བླ་མ་དང་།  །

པཎ་གྲུབ་བཅུ་བདུན་གྲུབ་ཆེན་བརྒྱད་ཅུ་སོགས།  །

བཀའ་གདམས་སྐྱེས་བུ་དམ་པ་རེ་རེ་འང་།  །

བྱམས་ལྡན་ཕ་མའི་དྲིན་ལས་མ་འདས་སོ།  །


སྤྱི་གཙུག་དད་པའི་ཞིང་ས་དཀོན་མཆོག་གསུམ།  །

ལས་དང་རྒྱུ་འབྲས་སེམས་ཀྱི་སྟེང་དུ་སྨིན།  །

གནམ་ལོ་གསར་བ་ཚེས་པའི་དུས་བཟང་འདིར།  །

སྐྱེ་རྒུ་ཡོངས་ལ་ནད་མེད་ཚེ་རིང་ཤོག  །


ལོ་སར་ལ་བཀྲ་ཤིས་བདེ་ལེགས་ཞུ།

 

སྟོབས་ལྡན་རྒྱལ།


བཀྲ་ཤིས་རྟགས་བརྒྱད་གཡང་ཁྱིམ་རྟེན་དུ་ཚེས།

བཀྲ་ཤིས་བདེ་ལེགས་བསྐལ་བའི་རྒྱན་དུ་ཤར། །

བཀྲ་ལ་བཀྲ་ཤིས་འཁྲུངས་བའི་གནམ་ལོ་ལ།།

བཀྲ་ཤིས་འཕེལ་བའི་ལེགས་ཚོགས་སྟོང་གིས་མཆོད། །


ཚེ་རིང་སྲུང་འཁོར་རིགས་དྲུག་ཀུན་ལ་སྨིན། །

ཚེ་རིང་ལོ་བརྒྱ་སྐྱེ་རྒུའི་ལུས་སུ་འཁོར། །

ཚེ་རིང་རྣམ་དྲུག་རྟག་བརྟན་འགྲོ་ལ་འཁྲུངས།

ཚེ་རིང་ཚེ་འཁོར་ཚེ་གཡང་དུས་ཀུན་ཤོག །


ལོ་གསར་བཟང་།

 

སྤྲེལ་རིན་བཟང་གིས།


འཇིགས་སྣང་ཁ་ཐུམ་རྒྱབ་པའི་ལྕགས་བྱི་ལོ།།

པྲོག་གསར་ནད་དུག་བཅས་ཏེ་བདེ་མོ་བྱོས།།

རེ་བ་སྟོང་གིས་བྱུག་པའི་ལྕགས་གླང་ལོ།།

ལྷ་དར་དཀར་བོ་ཞིག་གིས་བསུ་མ་བྱེད།།


གནམ་ལོ་གསར་དུ་ཚེས་པའི་རྟེན་འབྲེལ་གྱིས།།

བཤེས་གཉེན་དམ་པའི་མཛད་འཕྲིན་རྒྱས་པ་དང་།།

མ་ཡུམ་སློབ་གྲྭའི་མཚན་སྙན་རབ་འབར་དེ།།

ཆོལ་གསུམ་སྤུན་ཟླའི་འདོད་དོན་ལྷུན་འགྲུབ་ཤོག།


བཀྲ་ཤིས་གཡང་གི་ཚེས་པའི་ལོ་གསར་ནང་།།

དྲིན་ཅན་ཕ་མའི་སྐུ་གཟུགས་བདེ་ཐང་དང་།།

ཕུ་ནུ་མིང་སྲིང་རླུང་རྟ་ཡར་དར་བའི།།

བཀྲ་བདེ་ལེགས་གངས་ཅན་བོད་ལ་ཞུ།།



སྤྱིའི་ལྟ་སྐུལ་བ། སློབ་གྲྭའི་དབུ་བཞུགས་ལྷན་ཚོགས།
གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ།
ཞིབ་དཔྱད་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ།
རྩོམ་སྒྲིག་པ། འབའ་སྣང་གྲོལ། བསོད་ནམས་རབ་སྣང་། འཕྲིན་ལས་ཉི་མ། བན་ཤུལ་འཇམ་དབྱངས་ཡེ་ཤེས། དམ་ཆོས་ཕུན་ཚོགས།

འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། eb3h བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
11316750
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།