རྭ་རྒྱའི་མཐར་ཕྱིན་སློབ་མ་འོས་སྦྱོར། (དྲུག་པ) གངས་ཅན་དབྱངས་འཚོ།
  ཤེས་རིག་ནོར་བུའི་སློབ་གླིང་གིས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2022 ལོའི་ཟླ 10 ཚེས 6 རེས་གཟའ་ཕུར་བུ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» གཙོ་ངོས།» མཐར་ཕྱིན་འོས་སྦྱོར། »རྭ་རྒྱའི་མཐར་ཕྱིན་སློབ་མ་འོས་སྦྱོར། (དྲུག་པ) གངས་ཅན་དབྱངས་འ
རྭ་རྒྱའི་མཐར་ཕྱིན་སློབ་མ་འོས་སྦྱོར། (དྲུག་པ) གངས་ཅན་དབྱངས་འཚོ།
རྩོམ་སྒྲིག་པ།  འབའ་སྣང་གྲོལ། སྤེལ་དུས 2022-06-16ལྟ་ཀློག (23336)རྩོམ་ཁུངས: ངེད་དྲ་བ།པར་འདེབ།

རྭ་རྒྱའི་མཐར་ཕྱིན་སློབ་མ་འོས་སྦྱོར། 


  གངས་ཅན་དབྱངས་འཚོ་ནི་སྤྱི་ལོ་༡༩༩༠ལོར་བོད་ལྗོངས་ཆབ་མདོ་ཁ་རུབ་ས་ཁུལ་གྱི་སྨན་མདའ་རུ་ཤོད་དུ་སྐྱེས།  སློབ་གྲྭ་ཆུང་འབྲིང་ནས་མཐར་ཕྱིན་རྗེས་བོད་བརྒྱུད་ནང་ཆོས་ཟབ་སྦྱོང་གི་ཞོར་ནས་ཐུན་མོང་རིག་པའི་གནས་སྣ་ཚོགས་ལ་བྱང་བར་སྦྱངས། ༢༠༡༡ལོར་རྭ་རྒྱ་ཤེས་རིག་ནོར་བུ་གླིང་དུ་རྒྱུགས་སྤྲད་དེ་དུས་ཡུན་ལོ་གསུམ་གྱི་རིང་རྒྱ་དབྱིན་དང་རྩིས་འཁོར་ཆེད་སྦྱོང་བྱས་ཐོག་སློབ་གླིང་གི་རྩིས་འཁོར་ཆེད་ལས་དགེ་རྒན་གྱི་འགན་བཞེས། ༢༠༡༥ལོར་བཻ་རོ་ཙ་ན་རྩིས་འཁོར་གསབ་སྦྱོང་གི་ལས་གཞི་འགོ་བཙུགས་ཏེ་ད་ལྟའི་བར་ཡུལ་དངོས་དང་དྲ་ལམ་ཅི་རིགས་ནས་སློབ་མ་སྟོང་ཕྲག་ལས་བརྒལ་བ་གསོ་སྐྱོང་བྱས། ༢༠༡༧ནས་བོད་ཡིག་ཆ་འཕྲིན་དྲྭ་རྒྱར་ཉམས་ཞིབ་དང་སློབ་སྦྱོང་གི་གྲུབ་འབྲས་སུ་བཻ་རོ་སློབ་གསོ་དྲ་བ་དང་། བཻ་རོ་གཙུག་ལགAppགསར་སྤེལ་བྱས། མིག་སྔར་བོད་ལྗོངས་བཻ་རོ་ཙ་ན་རྩིས་འཕྲུལ་ལག་རྩལ་སློབ་གྲྭ་དང་། མཚོ་སྔོན་བཻ་རོ་ཙ་ན་རྩིས་འཕྲུལ་ཞབས་ཞུ་ཚད་ཡོད་སྤྱི་གཉེར་ཁང་གི་སློབ་སྤྱི་དང་འགན་འཛིན་དོ་དམ་པ། Adobe རྒྱལ་སྤྱིའི་ཇུས་འགོད་ཆེད་མཁས་པ།  བོད་ལྗོངས་ས་ཁུལ་རིམ་པའི་ལས་རིགས་སློབ་གསོའི་ཆེད་ལས་རྒྱུགས་རྟོག་པ་བཅས་ཡིན། 

སྔར་དཔར་དུ་བསྐྲུན་ཟིན་པའི་བརྩམས་ཆོས། དཔྱད་རྩོམ་སྐོར་བོད་ཀྱི་སྒྲ་སྦྱོར་རིག་པ། སྒྲ་སྦྱོར་རིག་པའི་ལྷན་ཐབས།  སྙན་རྩོམ་སྐོར་མེ་ཏོག་སིལ་ཕྲེང་། སྒྱུར་རྩོམ་སྐོར་འདོད་པའི་རོལ་རྩལ། ཆ་འཕྲིན་ལག་རྩལ་བརྙན་ཁྲིད་སྐོར། PSརྨང་གཞི་ནས་ཚད་མཐོའི་འཇུག་ཐབས།  Idརྩོམ་སྒྲིག་འཇུག་སྒོ། Aiསྙི་ཆས་འཇུག་སྒོ། རྩིས་འཕྲུལ་རྨང་གཞི་དང་གཞུང་ལས་ལག་རྩལ་འཇུག་སྒོ། Dnའབུར་གཟུགས་ལག་རྩལ།  Prབརྙན་རྩོམ་སྒྲིག་འཇུག་སྒོ། Aeའགུལ་རྣམ་རྩོམ་སྒྲིག་འཇུག་སྒོ། Auསྒྲ་རྩོམ་སྒྲིག་འཇུག་སྒོ། ཀུ་ཤུ་རྩིས་འཕྲུལ་འཇུག་སྒོ། དཔར་དུ་བསྐྲུན་འཆར་ཡོད་པའི་བརྩམས་ཆོས།ནུབ་ཕྱོགས་མཚན་ཉིད་རིག་པ་དང་མི་ཚེ་སྟོད་ཆ། བར་ཆ། སྨན་ཆ།  ཐད་ཀོར་གྱི་མཚན་ཉིད་ལོ་རྒྱུས་དང་སྙན་རྩོམ་བཏུས་མ།  གཞན་དྲ་རྒྱ་དང་འཛུགས་སྐྲུན་སྐོར་གྱི་བརྙན་ཁྲིད་སྐོར། 

ཁྲིམས་སྲིད་ལ་སྦྱར་བའི་དུང་བརྗོད་སྙན་ངག

རྩོམ་པ་བོ།   ཚོའོ་ཚོའོ།[ཧན་ཤར་མའི་སྙན་ངག་པ]


འཇིག་རྟེན་འདི་ནས་མི་ཉིད་ཀུན་གྱི་མཆོག །  

གནམ་བདག་གོང་མས་ཁྲིམས་སྲོལ་ལེགས་བཙུགས་ཏེ། །

མཐའ་བཞིའི་ཁྱོན་ལ་ཤིང་རྟའི་རྐང་རྗེས་ཕབ། །

ཕྱི་དགྲ་བཏུལ་ཏེ་ནང་གྲོགས་ཐམས་ཚུལ་གྱིས། །

ལེགས་པར་སྐྱོང་བའི་ལོ་རྒྱུས་སྙིང་དུ་སིམ། །

ཀོང་དང་ཧོ་སོགས་རྗེ་གནས་དྲང་སྙོམས་ལྟར། །

མཛངས་ལ་བཀུར་བས་མངའ་ཐང་ཡུན་དུ་དར། །

རིམ་པར་བརྒྱུད་པའི་རྒྱལ་ཁྲིམས་སྲོག་ཏུ་བྱས། །

ལུགས་མེད་སྤྱོད་པ་ཡུལ་ནས་རིང་དུ་འགོངས། །

སྔ་སྲོལ་བསྒྱུར་ཀྱང་ད་སྲོལ་གསར་བ་ཡིས། །

ཉམས་མེད་རྒྱལ་ཁྲིམས་མངའ་འབངས་ཀུན་གྱི་གཉེན། །

རབ་ཏུ་གནས་པའི་གཞུང་དྲང་བདེན་པའི་མིག །

ཕྱི་རབས་མི་ཡི་གདོང་ལ་མ་བརྐོས་སམ། །

རྒྱལ་རབས་རྗེས་མས་ལུགས་བཟང་རྡུལ་ལྟར་དོར། །

མངའ་འབངས་མི་སེར་སྒོ་ཁྱིའི་ཚུལ་དུ་བཀོལ། །  

ལྟོགས་མུག་ཀློང་ནས་འོ་དོད་ཐོས་པའི་ཚེ། །

གནའ་བོ་ཐང་ཡོའི་སྐབས་ཀྱི་ལུད་རྫས་ཀྱང་། །

ད་ལྟ་རང་ལུས་གསོ་བའི་རྒྱན་མཐོང་ན། །

ཀྱེ་མ་རྒྱལ་ཁམས་འཇིག་པའི་གདུང་བ་ཆེ། །

ཀུན་གྱིས་བསྔགས་བྱར་གྱུར་པའི་པོའོ་ཡེ་ཡིས། །

ཁྲིམས་དོར་སྲོལ་ཉམས་མི་དགེའི་མཐུ་ཉིད་དུ། །

གཟིགས་ཏེ་སྔར་ཡོད་ལུགས་བཟང་གང་དུ་སྤེལ། །

ནག་ཉེས་ཡུན་དུ་འགོར་ན་སུ་ཡིས་སེལ། ། །

སྤྱོད་བཟང་ལག་དུ་བླངས་ན་ད་ལྟ་ཉིད། །

མཁས་པ་ཞུས་ཡོའི་ལུགས་ལྟར་ངན་ཁག་རྣམས། །

གཞན་ནས་གཞན་དུ་དཀྲིས་ན་རྫོགས་མཐའ་བྲལ། །

སུ་ལ་གཞུང་དྲང་བརྩེ་བའི་འཛུམ་དཔལ་ལྡན། །

དེ་ལ་ཆ་མེད་གྲོགས་ཀྱང་རྒྱང་ནས་འདུ། །

      ཞེས་མཁས་པོའི་དབང་བོ་བེ་རི་འཇིགས་མེད་ལགས་ཀྱི་ཐུགས་སྐུལ་ལྟར་རྒྱ་བོད་ལོ་ཙཱ་བ་གངས་དབྱངས་འཚོར་འབོད་པས་དོན་སྒྱུར་གཙོ་བོར་བྱས་ཏེ་ཤར་མར་ཞུས་པ་ལ་འགལ་ནོངས་ཅི་མཆིས་ཐམས་ཅད་ལོ་ཙཱ་བར་དཀྲི་འོས་སོ།།

འཇིག་རྟེན་ནས་རྒྱང་ཐག་རིང་ཤོས།

རྩོམ་པ་བོ། ཐེ་ཀོར།

 འཇིག་རྟེན་ནས་རྒྱང་ཐག་ཆེས་རིང་ཤོས་དེ།

སྐྱེ་བ་དང་འཆི་བའི་བར་ཐག་མིན་པར།

ང་རང་ཁྱོད་ཀྱི་མདུན་དྲུང་དུ་འགྲེང་ཚེ།

ཁྱོད་ཀྱིས་ང་ཅི་ཙམ་ད་དུང་ཁྱོད་ལ་དགའ་བ་མི་ཤེས་པའི་ཧེ་བག་དེ་ཡིན།

འཇིག་རྟེན་ནས་རྒྱང་ཐག་ཆེས་རིང་ཤོས་དེ།

ང་རང་ཁྱོད་ཀྱི་མདུན་དྲུང་དུ་འགྲེང་ཚེ།

ཁྱོད་ཀྱིས་ང་ཅི་ཙམ་ཁྱོད་ལ་དགའ་བ་མ་ཤེས་པའི་ཧེ་བག་དེ་མིན་པར།

བརྩེ་འདུན་གྱིས་མྱོས་པའི་འཁྲུལ་སྣང་དང་ང་ཁྱོད་ལ་

དགའ་ཞེས་བཤད་མི་སྤོབས་པའི་བར་ཁྱད་དེ་ཡིན།

འཇིག་རྟེན་ནས་རྒྱང་ཐག་ཆེས་རིང་ཤོས་དེ།

བརྩེ་འདུན་གྱིས་མྱོས་པའི་འཁྲུལ་སྣང་དང་ང་ཁྱོད་ལ་དགའ་ཞེས་བཤད་མི་སྤོབས་པའི་བར་ཁྱད་དེ་མིན་པར།

ཁྱོད་ཉིད་དྲན་པའི་གདུང་སེམས་ལྕི་མོ་འདི་དང་།

སྙིང་མཐིལ་ཁོ་ནར་རུམ་པའི་གསང་གཏམ་དེའི་བར་ཐག་ཡིན།

འཇིག་རྟེན་ནས་རྒྱང་ཐག་ཆེས་རིང་ཤོས་དེ།

ཁྱོད་ཉིད་དྲན་པའི་གདུང་སེམས་ལྕི་མོ་འདི་དང་།

སྙིང་མཐིལ་ཁོ་ནར་རུམ་པའི་གསང་གཏམ་དེའི་བར་ཐག་མིན་པར།

ཕན་ཚུན་སེམས་གཏིང་ནས་དུང་ཞེན་གྱིས་སྦྲེལ་ནའང་།

ལྷན་དུ་འགྲོ་བར་མི་བཟོད་པའི་བར་ཁྱད་དེ་ཡིན།

འཇིག་རྟེན་ནས་རྒྱང་ཐག་ཆེས་རིང་ཤོས་དེ།

ཕན་ཚུན་སེམས་གཏིང་ནས་དུང་བའི་བརྩེ་བ་དང་།

ལྷན་དུ་འགྲོ་བར་མི་བཟོད་པའི་བར་ཁྱད་དེ་མིན་པར།

ཐབས་བཀོད་བྲལ་བའི་བཀག་འགོག་གི་གནས་ཚུལ་གསལ་བོར་མཐོང་ཡང་།

ད་དུང་ཞེ་སེམས་ཀྱི་འདུན་པ་ཆད་མེད་དུ་འབྲེལ་བའི་བར་ཐག་དེ་ཡིན།

འཇིག་རྟེན་ནས་རྒྱང་ཐག་ཆེས་རིང་ཤོས་དེ།

ཐབས་བཀོད་བྲལ་བའི་བཀག་འགོག་གསལ་བོར་མཐོང་བའི་གནས་ཚུལ་དང་།

ད་དུང་ཞེ་སེམས་ཀྱི་འདུན་པ་ཆད་མེད་དུ་འབྲེལ་བའི་བར་ཐག་དེ་མིན་པར།

སུ་ཞིག་གིས་སྲིན་ལག་བསྲིངས་ཏེ་(སྣང་མེད་དུ་བསྐྱུར་བའི་སེམས་)ཁྱོད་དང་ཁྱོད་ཀྱི་བརྩེ་བའི་བར་དུ།

བརྒལ་ཐབས་མེད་པའི་ཡུར་བུ་ཞིག་སྔོག་འདོན་བྱས་བའི་བར་ཐག་དེ་ཡིན།

འཇིག་རྟེན་ནས་རྒྱང་ཐག་ཆེས་རིང་ཤོས་དེ།

སྡོང་བོ་དང་སྡོང་བོའི་བར་ཁྱད་དེ་མིན་པར།

རྩ་བ་ལྷན་དུ་འབུས་པའི་ཡལ་ག་ཟུང་གཅིག

དྲག་རླུང་ཁྲོད་ཕན་ཚུན་འཁེན་པར་མི་ནུས་པའི་བར་ཐག་དེ་ཡིན།

འཇིག་རྟེན་ནས་རྒྱང་ཐག་ཆེས་རིང་ཤོས་དེ།

ཡལ་ག་ཕན་ཚུན་བརྟེན་ཐབས་མེད་པའི་ཧེ་བག་དེ་མིན་པར།

ཕན་ཚུན་ལ་རེ་བའི་རྒྱུ་སྐར་གྱི་ཚོམས་བུ་དག

ཤུལ་རྗེས་ཟབ་མོ་ཞིག་ལྷན་དུ་འཇོག་པའི་གོ་སྐབས་དབེན་པའི་བར་ཐག་དེ་ཡིན།

འཇིག་རྟེན་ནས་རྒྱང་ཐག་ཆེས་རིང་ཤོས་དེ།

སྐར་ཚོམས་ཕན་ཚུན་གྱི་འཁོར་ལམ་དེ་མིན་པར།

གལ་ཏེ་རྗེས་ཤུལ་མཉམ་དུ་འཇོག་པའི་དབང་དུ་བཏང་རུང་།

སྐད་ཅིག་མའི་འཁོར་བསྐྱོད་ཁྲོད་ཟིན་མེད་དུ་ཡལ་བའི་བར་ཐག་དེ་ཡིན།

འཇིག་རྟེན་ནས་རྒྱང་ཐག་ཆེས་རིང་ཤོས་དེ།

སྐད་ཅིག་མའི་འཁོར་བསྐྱོད་ཁྲོད་ཟིན་མེད་དུ་ཡལ་བའི་བར་ཐག་དེ་མིན་པར།

འཕྲད་པའི་གོ་སྐབས་རྫོགས་པ་དང་།

འདུ་བའི་ཐབས་ལམ་དབེན་པའི་བར་ཐག་དེ་ཡིན།

འཇིག་རྟེན་ནས་རྒྱང་ཐག་ཆེས་རིང་ཤོས་དེ།

ཉ་མོ་དང་འདབ་ཆགས་ཀྱི་བར་ཐག་དེ་ཡིན།

གཅིག་ནི་ནམ་མཁའི་མཐོངས་སུ་གནས་ཤིང་།

གཅིག་ཤོས་ནི་མཚོ་མོའི་གཏིང་རུམ་དུ་འཚོ།

སྟོན་མཚན་རིང་མོའི་མཛའ་གཞས།


རྩོམ་པ་བོ།  ལེ་བྷེ། [ཐང་གི་སྙན་ངག་པ]

ཁྲང་ཨན་མཁར་ལ་སྟོན་ཟླའི་འཛུམ་དཔལ་བཞད། །

གྲོང་དང་ཁྱིམ་མིའི་འུར་ཟིང་རྣ་བར་གཟན། །

སྟོན་རླུང་བསེར་བུ་ངེས་མེད་ལྡང་བ་ཡིས། །

གཡང་ཊིའི་སེམས་རྟེན་དྲན་པའི་རུམ་དུ་འཁྱིལ། །

ཞུང་ནུའི་འཐབ་འཛིང་ནམ་ཞིག་མཇུག་གྲིལ་ཏེ། །

མཛའ་གྲོགས་ཁྱོ་བོ་དམག་མཚམས་འཇོག་པར་བྲེལ།།

     སྨྱུག་སྤྱིལ།

རྩོམ་པ་བོ།  ཝང་ཝེ། [ཐང་གི་སྙན་ངག་པ། ]

ཁུ་སིམ་ལྗོན་ཚལ་གཅིག་པུར་གནས་པའི་ཚེ། །

དངན་པ་རིང་མོ་རྒྱུད་མངས་སྒྲ་ལས་མཆེད། །

མི་མེད་གསང་བའི་བསྟི་གནས་ཉམས་དགའ་བར། །

ཟླ་གཞོན་ཁོ་ནས་བདག་གི་སྐྱོ་བ་བསངས། །

དཔྱིད་ཀྱི་ཞོགས་པ།

རྩོམ་པ་བོ།  མེན་ཁུ་རིན། [ཐང་གི་སྙན་ངག་པ། ]

གང་སར་བྱེའུ་གླུ་གྱེར་བའི་གདངས་དབྱངས་དང་། །

སྐྱ་རེངས་མདངས་ཀྱིས་སྟུག་པོའི་རྨི་ལམ་བཅོམ། །

ནམ་གུང་དལ་བུར་རྒྱུ་བའི་ཆར་རླུང་གིས། །

དཔྱིད་བཞད་མེ་ཏོག་འདབ་མ་དུ་ཙམ་བྲུལ། །

རྫ་ཆའི་མགྲིན་གླུ།

རྩོམ་པ་བོ།  ཝང་བེ། [ཐང་གི་སྙན་ངག་པ། ]

དཔྱིད་མཚན་ཁུ་སིམ་ཀློང་དུ་གྱར་བའི་ཚེ། །

དྲི་ལྡན་མེ་ཏོག་འགའ་ཞིག་ཐང་དུ་ཟགས། །

ཟླ་གཞོན་མཁའ་ལ་རྩེན་པས་རི་ཀླུང་གི། །

བྱེ་འུའི་མགྲིན་གླུ་སྣ་ཚོགས་རྫ་ཆུར་བསྐྱལ། །

སྟོན་གྱི་དྲན་པ།

རྩོམ་པ་བོ། ཀྲང་ཅིས།[ཐང་གི་སྙན་ངག་པ]

ལུའོ་དབྱང་མཁར་ལ་སྟོན་རླུང་བསིར་བུར་རྒྱུ། །

སྙན་ངག་པ་ལ་ཡུལ་འཕྲིན་འབྲི་འདུན་སྐྱེས། །

དྲན་པའི་གདུང་བ་ཤིན་ཏུ་ཟབ་ལྕི་བས། །

འཕྲལ་དུ་བྲིས་ཀྱང་འདོད་འདུན་མི་རྫོགས་ཤིང་། །

ཡུལ་བགྲོད་འགྲུལ་བར་བར་ཆད་བྱེད་པར་འཇིགས། །


 
བྲུལ་བའི་མེ་ཏོག

རྩོམ་པ་བོ།  ལིས་ཧྲིང་ཡན། [ ཐང་གི་སྙན་ངག་པ། ]

ཐོག་བརྩེཊ་འགྲུལ་བ་རྒྱང་དུ་གཤེགས་ཤུལ་ནས། །

ལྡུམ་ར་ཆུང་ཆུང་མེ་ཏོག་འདབ་མས་ཁེངས། །

སྡོང་རྐང་ཡལ་ག་ཀྱག་དཀྱོག་འཁྱུད་པའི་མོད། །

ལོ་མ་རེ་རེ་མི་སྡུག་ཉམས་ཀྱིས་མནར། །

ཚུལ་འདི་མཐོང་བས་ཕྱགས་པའི་སྤོབས་པ་ཕྲ།  །

འཕྲང་ལ་ཅེར་ཡང་འགྲུལ་བ་སྔར་བཞིན་ལོག །

མེ་ཏོག་བསུང་ངད་དཔྱིད་དང་ལྷན་དུ་རྫོགས། །

འདོད་དོན་དྲན་ཚེ་མཆི་མས་ལུས་ཟུང་བརླན། །

གྱེས་ཕྱག་འབུལ་བ།

རྩོམ་པ་བོ། ཏུའུ་མོ། [ཐང་གི་སྙན་ངག་པ། ]

མཛའ་བོ་འབྲལ་ཁར་བཅོས་མའི་མཛུམ་མདངས་ཀྱིས། །

ཆང་ཕོར་ཁ་ནས་དགོད་སྒྲ་ག་ལ་ཐོན། །

སྒྲོན་མེ་འདིས་ཀྱང་གྱེས་བྲལ་གདུང་བ་ཡིས། །

འུ་ཅག་སླད་དུ་མཚན་ནམ་མིག་ཆུས་བསྐྱལ། །  

མཚན་དུས་ཀྱི་ཕིང་ཅིན་གཙང་བོ།

རྩོམ་ཁུངས། [ཆུ་ངོགས་གཏམ་རྒྱུད། ]


སྨུག་ཆར་དཀྲིགས་པའི་ཕིང་ཅིན་གཙང་བོ་ལགས།  །

ཁྱེད་ལས་མཛེས་སྡུག་སྲིད་འདིར་ཡོད་རེ་སྐན། །

རབ་རིབ་ཟླ་གཞོན་མཚོ་ལ་ལྷུང་བ་ནི། །

མཛེས་མའི་ལན་བུས་བཞིན་དཔལ་འཆིང་བ་འདྲ། །

ཟླ་ངོགས་པི་ཝང་འཁྲོལ་བའི་སྒྲ་སྙན་དེ། །  

ཡུན་དུ་བོར་ཚེ་སྐྱ་མདོག་འདམ་གླིང་འདི། །

ད་ལྟ་གཙང་བོའི་རླབས་ཀྱིས་ཡོམ་ཡོམ་སྒུལ། །

 མཚན་མོ།

རྩོམ་པ་བོ།  ཕུ་ཞིན་ཅིན། [ཨུ་རུ་སུའི་སྙན་ངག་པ། ]

བརྩེ་ཞེན་འཇུ་ཐག་དམ་དུ་སྦྲེལ་བ་ཡིས། །

ལྷིང་འཇགས་མཚན་མོ་སྐྱོ་བའི་གླུ་ལ་གཏད། །

སྒྲོན་འོད་ངོགས་ནས་སྙན་ཚིག་འཚོལ་བའི་ཚེ། །

དྲན་པའི་གཅོང་གིས་ལང་ཚོ་ཉམས་འགྱུར་ཞིང་། །

འོ་དོད་ཀློང་ནས་ཁྱོད་ལ་དགའ་ཞེས་བོས། །

རོལ་དབྱངས་འཚོལ་བ།

རྩོམ་པ་བོ།  ཞི་ལེ། [དབྱིན་ཇིའི་སྙན་ངག་མ། ]

བདག་ནི་རོལ་དབྱངས་འཚོལ་བའི་ལམ་དུ་ཞུགས། །

འདུན་པ་འདི་ནི་སུས་ཀྱང་འགོག་ཐབས་བྲལ། །

དབྱངས་རྟགས་རེ་ལ་ཆང་གི་བྲོ་བ་རེ། །

རོལ་དབྱངས་པང་དུ་དངུལ་མདོག་འོད་ཀྱིས་འཐིགས། །

ཇི་ཙམ་གཞིབ་ཀྱང་ངོམས་མེད་བྲོ་བ་འདིས། །

སེམས་ཀྱི་འཆིང་ཐག་དལ་གྱིས་རབ་འཁྲོལ་ཞིང་། །

བདེ་དགའི་ཀློང་དུ་སྒྲ་མེད་ལྷོད་ཀྱིས་འཁྱམས། །

རྩོམ་བཅད།


རྩོམ་པ་བོ།  པཎ་ཀྲི་ལན། [རྒྱའི་དེང་རབས་སྙན་ངག་པ། ]

ཁྱོད་ཉིད་ཟམ་སྟེང་འགྲེང་སྟེ་ཡུལ་ལ་གཡེངས། །

གཡེངས་པའི་མི་དེས་ཐོག་ཁང་དྲྭ་མིག་ཅེར། །

ཅེར་བའི་ཚེ་ན་སྒེའུ་ཁུང་ཟླ་བས་བརྒྱན། །

བརྒྱན་པའི་དུས་དེར་རྒྱང་གི་རྨི་ལམ་རྒུམ། །

བརྩེ་དུང་གི་གོད་ཆག

རྩོམ་པ་བོ།  R.S ཐོ་མ་སི།  [ཨུ་རུ་སུའི་དུང་བརྗོད་སྙན་ངག་པ།]

ཁོ་བོ་གཏན་དུ་ཁྱེད་ལ་འཁྲེང་བའི་སེམས། །

ཁྲུས་རོལ་ངང་བའི་མགྲིན་གླུར་ལྷོད་ཀྱིས་སིམ། །

བགྲང་བྱའི་གཉེར་ཐག་ཐོད་དུ་འཆིང་བའི་དུས། །

བརྩེ་དུང་དུས་སྐལ་ཅི་འདྲའི་ཡུན་ཐུང་ཞིག །

སྒེག་མཛེས་ལང་ཚོའི་མེ་ཏོག་ཚོམས་བུ་དག །

སྐྱོ་ངལ་མིག་ཆུས་གཏིང་ནས་གཟན་པའི་ཚེ། །

འཆི་བདག་བདུད་ལ་བཅོས་མའི་འཛུམ་དཀར་གྱིས། །

རིང་ནས་བསུ་མ་བྱེད་ལ་དགའ་བ་འཕེལ། །

གསལ་བཤད།  
གཟའ་འཁོར་རེའི་ནང་དུ་གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བར་ཆེད་དུ་སློབ་གླིང་འདིའི་ཕུལ་བྱུང་མཐར་ཕྱིན་སློབ་མ་རེ་འོས་སྦྱོར་བྱེད་འཆར་ཡོད་པས། མཐར་ཕྱིན་འཛིན་གྲྭ་སོ་སོའི་སྤྱི་ཚོགས་སྟེང་གཟེངས་ཐོན་གྱི་མཐར་ཕྱིན་སློབ་མ་དག་སློབ་ཚོགས་གཞུང་ལས་ཁང་དུ་འོས་སྦྱོར་གནང་རོགས་ཞུ།  སློབ་ཚོགས་གཞུང་ལས་ཁང་གི་ཁ་པར་ཨང་གྲངས།  (0975) 838 9857    སྐད་འཕྲིན། 15109745084



སྤྱིའི་ལྟ་སྐུལ་བ། སློབ་གྲྭའི་དབུ་བཞུགས་ལྷན་ཚོགས།
གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ།
ཞིབ་དཔྱད་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ།
རྩོམ་སྒྲིག་པ། འབའ་སྣང་གྲོལ། བསོད་ནམས་རབ་སྣང་། འཕྲིན་ལས་ཉི་མ། བན་ཤུལ་འཇམ་དབྱངས་ཡེ་ཤེས། དམ་ཆོས་ཕུན་ཚོགས།

འདྲེན་བཀོལ:
61.4K

  དཔྱད་གཏམ ( 1 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། eb3h བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
  རྭ་རྒྱའི་མཐར་ཕྱིན་སློབ་མ་འོས་སྦྱོར། (དྲུག་པ) གངས་ཅན་དབྱངས་འཚོ།   སྤེལ་མཁན།: གེའུ་དམར་པོ། སྤེལ་དུས:2022/6/17
ལག་རྩལ་ཆེད་ལས་པ་ཁོང་འདྲ་བ་མང་པོ་གསོ་སྐྱོང་བྱེད་རོགས།
  པར་ངོས1/1 པར་ཡོད།
ལྟ་ཀློག་གྲངས་ཀ
13672553
 
འབྲེལ་གཏུག་བྱ་ཡུལ།    ཁ་པར།  15283703999    E-mail:QQ:516617821
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།