རྭ་རྒྱའི་མཐར་ཕྱིན་རྩོམ་པ་བོ་འོས་སྦྱོར། (བཞི་བ) རྟ་ནག་སྐལ་བཟང་ལུང་རིགས།
  ཤེས་རིག་ནོར་བུའི་སློབ་གླིང་གིས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2022 ལོའི་ཟླ 6 ཚེས 27 རེས་གཟའ་ཟླ་བ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» གཙོ་ངོས།» མཐར་ཕྱིན་འོས་སྦྱོར། »རྭ་རྒྱའི་མཐར་ཕྱིན་རྩོམ་པ་བོ་འོས་སྦྱོར། (བཞི་བ) རྟ་ནག་སྐལ་བཟ
རྭ་རྒྱའི་མཐར་ཕྱིན་རྩོམ་པ་བོ་འོས་སྦྱོར། (བཞི་བ) རྟ་ནག་སྐལ་བཟང་ལུང་རིགས།
རྩོམ་སྒྲིག་པ།  འབའ་སྣང་གྲོལ། སྤེལ་དུས 2022-06-01ལྟ་ཀློག (1633)རྩོམ་ཁུངས: ངེད་དྲ་བ།པར་འདེབ།

རྭ་རྒྱའི་མཐར་ཕྱིན་རྩོམ་པ་བོ་འོས་སྦྱོར།  


  རྟ་ནག་སྐལ་བཟང་ལུང་རིགས། གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ལྔ་བའི་མཐར་ཕྱིན་སློབ་མ།  མཚོ་སྔོན་པོའི་ལྷོ་རྒྱུད་ཀྱི་བདུད་ཤུལ་གྱོལ་སྐོར་ཞེས་པའི་འབྲོག་སྡེ་ཆེན་མོ་ཞིག་ཏུ་སྐྱེས། ཆུང་དུས་ནས་ས་གནས་ཀྱི་སློབ་ཆུང་དང་གྱོལ་སྐོར་དགོན་དགེ་ལྡན་ཐེག་ཆེན་ཆོས་འཁོར་གླིང་། སྐུ་འབུམ་བྱམས་པ་གླིང་སོགས་སུ་སློབ་གཉེར་བྱས། སྤྱི་ལོ༢༠༠༠ལོར་གངས་ལྗོངས་ཤེས་རིག་ནོར་བུའི་སློབ་གླིང་དུ་ཞུགས་ནས་བོད་རྒྱ་དབྱིན་གསུམ་རྩིས་འཁོར་དང་བཅས་པར་སློབ་གཉེར་བྱས་ཏེ་སློབ་མཐར་ཕྱིན། ༼གངས་རྒྱན་མེ་ཏོག་༽གཙོས་བོད་ཁུལ་གྱི་དུས་དེབ་དང་ཚགས་པར་སོགས་སུ་སྙན་ངག་དང་། ལྷུག་རྩོམ། དཔྱད་རྩོམ་ཉིས་བརྒྱ་ཙམ་སྤེལ། སྙན་ངག་བརྩམས་ཆོས་ཀྱི་སྐོར་ལ་༼མྱ་ངན་གྱི་རོལ་དབྱངས༽སོགས་དང་། ལོ་རྒྱུས་ཀྱི་སྐོར་ལ༼མཚོ་སྔོན་པོའི་ལྷོ་རྒྱུད་ཀྱི་འབྲོག་སྡེ་དག་གི་བྱུང་བ་བརྗོད་པ༽བཅས་དང་། གཞན་ཡང་འབྱུང་འགྱུར་དེབ་གཟུགས་སུ་དགྲམ་འགྱུར་གྱི་དཔེ་ཀློག་ཟིན་ཐོ༼རྣམ་ཐར་བརྒྱ་ཡི་བཀླག་བྱང་༽སོགས་ཡོད། གཞན་གྲགས་ཅན་མི་སྣའི་གཏམ་བཤད་བོད་འགྱུར་མ་སོགས་ཡོད་ལ། ད་ལྟ་རང་ཡུལ་དུ་སློབ་གཉེར་གྱི་རྒྱུནབསྐྱངས་དང་སྐྱོང་བཞིན་པ་བཅས་སོ།།


གསོལ་འདེབས་ཀུན་བཟང་མཆོད་སྤྲིན་ཞེས་བྱ་བ་བཞུགས་སོ།།

བླ་མ་རིན་པོ་ཆེ་རྗེ་སྐལ་བཟང་ཡེ་ཤེས་གྲགས་ལ་ཕུལ་བ།

བདག་བློ་འཛིན་མའི་ལྟོ་བར་མ་ཤོངས་པའི།།
ཁྱོད་ཀྱི་མཁྱེན་པ་རྒྱ་མཚོའི་ཀློང་ཆེན་གྱིས།།
བདག་སེམས་དད་པའི་ཝུ་དཀར་རྩེན་པར་བྱས།།
ཟབ་ཡངས་མཁྱེན་པའི་གཏེར་ལ་གསོལ་བ་འདེབས།།

རྒྱལ་བསྟན་འཛིན་ཅིང་སྤེལ་བར་མཛད་པ་ལ།།
ཐོས་བསམ་སྒོམ་པའི་དཔལ་ལ་རག་ལས་ཤིང་།།
དེ་ཡང་སྔོན་དུ་ཐོས་པ་གལ་ཆེན་གཟིགས།།
རྒྱ་ཆེན་ཐོས་པ་མཛད་ལ་གསོལ་བ་འདེབས།།

བདེན་པར་འཛིན་པ་ཆུ་འཛིན་ནག་པོའི་གཟུགས།།
ཀ་དག་གདོད་མའི་དབྱིངས་སུ་བསྐྲད་བྱས་ཏེ།།
སྣང་སྟོང་ཕན་ཚུན་གྲོགས་སུ་འཆར་བ་ཡི།།
ཀླུ་སྒྲུབ་དགོངས་དོན་རྟོགས་ལ་གསོལ་བ་འདེབས།།

རྟེན་འབྱུང་རིགས་པའི་ཞུགས་ཆེན་མཆེད་པའི་གཟིས།།
དངོས་འཛིན་རྐང་འཐུང་གཏན་དུ་སྲེག་མཛད་ནས།།
བློས་བྱས་ལྟ་ངན་མུན་པའི་དཔུང་བུ་ཆུང་།།
མིང་གི་ལྷག་མར་བཅོམ་ལ་གསོལ་བ་འདེབས།།

མཁྱེན་པ་རྟ་བདུན་འདྲེན་པའི་ཤིང་རྟ་ཡིས།།
ལེགས་པར་དྲངས་པའི་རྒྱུད་དོན་མཐའ་དྲུག་དང་།།
ཚུལ་བཞི་ཉིན་བྱེད་འོད་ཀྱི་རླབས་ཕྲེང་གིས།།
བླ་མེད་ཐེག་པ་འཛུམ་ལ་གསོལ་བ་འདེབས།།

ལུང་ཆོས་སྡེ་སྣོད་ནགས་མའི་དོ་ར་རུ།།
བསླབ་གསུམ་མེ་ཏོག་རྒྱན་གྱིས་སྦུད་པ་ཡིས།།
དད་འབངས་ཁུ་བྱུག་འགུགས་པའི་ལྕགས་ཀྱུ་ཅན།།
ཐར་བའི་ས་མཁན་ཁྱོད་ལ་གསོལ་བ་འདེབས།།

བསྟན་པའི་ནང་མཛོད་འདུལ་བའི་ཉམས་ལེན་ཀྱི།།
འདུལ་ཁྲིམས་ཆུ་ལོན་བརྟན་པོ་ཉེར་བཙུགས་ནས།།
བག་མེད་ཉེས་པའི་ཆུ་ཀླུང་འགོག་མཛད་པའི།།
གནས་བརྟན་འདུལ་བ་འཛིན་ལ་གསོལ་བ་འདེབས།།

བཀའ་པོད་ལྔ་སོགས་གཞུང་བརྒྱའི་གངྒཱ་མ།།
དགོན་འདིར་ལེགས་པར་དྲངས་པའི་ཉེར་ལེན་གྱིས།།
བསྟན་པའི་ཀ་ཆེན་སླར་ཡང་བཙུགས་སོ་ཞེས།།
ལྷ་རྣམས་བསྔགས་པ་མཛད་ལ་གསོལ་བ་འདེབས།།

ཀུན་བཟང་སྤྱོད་མཆོག་པད་མའི་མཚོ་ཆེན་ངོགས།།
ཡིད་ཀྱི་ངང་མོ་རྩེན་པའི་གདུལ་བྱའི་ཚོགས།།
དད་པའི་དབྱངས་སྙན་ཀུན་གསལ་མཐའ་ལས་འགོངས།།
འཕྲིན་ལས་མཁའ་དང་མཉམ་ལ་གསོལ་བ་འདེབས།།

འདི་ན་མྱ་ངན་མེད་པའི་རྐང་འཐུང་གིས།།
བསིལ་བའི་རེག་བྱ་སྦྱིན་པའི་འདབ་མ་སྟོང་།།
ཉིན་དང་མཚན་ལ་འདབ་ཡངས་ཟུམ་པར་བྱེད།།
སྙིང་རྗེ་པད་དཀར་འཛིན་ལ་གསོལ་བ་འདེབས།།

ཕ་རོལ་མངའ་ཐང་མི་བཟོད་འབྱུང་བྱའི་ཁྱུས།།
མི་མཐུན་དབྱེན་གྱི་སྦྱོར་བ་བརྩམས་ན་ཡང་།།
བརྩེ་ཆེན་ཕྱག་གིས་ནམ་ཡང་མི་གཏོང་ཞེས།།
བདག་ལ་ལྷག་པར་བརྩེ་ལ་གསོལ་བ་འདེབས།།

ཤེས་རབ་ཉི་མའི་འོད་ཀྱི་འཛུམ་མདངས་ཀྱིས།།
དད་པའི་པད་མོ་མངོན་པར་འཛུམ་པ་ཅན།།
ནམ་ཡང་སྐྱབས་ལས་མི་འདོར་ཐུགས་རྗེ་ཅན།།
འདྲེན་མཆོག་ལྷ་ཡི་ལྷ་ལ་གསོལ་བ་འདེབས།།

མདོར་ན་ཡོངས་རྫོགས་བསྟན་པའི་གནད་རྣམས་ཀུན།།
ཇི་བཞིན་གཟིགས་ནས་ལེགས་པར་བསྟན་བྱས་པས།།
ཐར་བར་འདོད་པ་ཡོངས་ཀྱི་ས་མཁན་མཛད།།
ཚད་མའི་སྐྱེས་མཆོག་ཁྱོད་ལ་གསོལ་བ་འདེབས།།

དེང་ནི་བླ་སྤྲུལ་ཆེན་པོའི་ཆེན་པོ་དག།
རྒྱུ་འབྱོར་མངའ་ཐང་བླ་བྲང་རྫིག་པོ་ལ།།
དགྱེས་ཀྱང་ཁྱོད་ཉིད་འདོད་ཆུང་ཆོག་ཤེས་མཛད།།
སྙིགས་དུས་མི་ལ་གཉིས་པར་གསོལ་བ་འདེབས།།

ལེགས་ཉེས་མི་ཤེས་མུན་པར་འཁྱམས་པ་དང་།།
ཀུན་ནས་རབ་ཏུ་འཐོམས་པའི་ཡིད་ཅན་ལ།།
བཤད་དང་སྒྲུབ་པའི་སྣང་བའི་མཛོད་ཆེན་གྱིས།།
ཐར་བའི་ལམ་ཆེན་གསལ་བའི་དཔལ་ཐོབ་ཤོག།


དབྱངས་ཅན་མ།

བརྩེ་ཆེན་པད་དཀར་ཕུང་ཕུང་ཆགས་པའི་འོད།།
ཉམ་ཐག་སེམས་ལ་དར་ཅིག་ལྷུང་བ་ན།།
བདེ་ཆེན་དངོས་གྲུབ་རེག་པའི་དབྱངས་ཅན་ལྷ།།
ཟབ་དོན་གླུ་རུ་འགུགས་བཞིན་ད་ཚུར་སྤྱོན།།

ང་ཡིས་མེ་ཏོག་རྐང་གཅིག་བཏེགས་བྱས་ནས།།
ཁྱེད་ཀྱི་སྒོ་དྲུང་ག་ལེར་ཉུལ་བ་ན།།
བརྩེ་བའི་ཕྱག་རྒྱ་ཅན་གྱི་ལྷ་མོ་དེས།།
བདག་ལ་སྤྱན་མིག་གཡོར་རམ་དབྱངས་ཅན་མ།།

མྱ་ངམ་ཐང་གི་ཚོར་བ་མིག་ཆུ་ཅན།།
ཁྱོར་བར་བཏེགས་ནས་སྨྲེ་སྔགས་འདོན་ལགས་ན།།
ཞི་བའི་འཛུམ་མདངས་ཅན་གྱི་ལྷ་མོ་དེས།།
བདག་གི་མིག་ཆུ་འབྱིད་དམ་དབྱངས་ཅན་མ།།

སྨྲ་བ་ཆད་ཅིང་གྲེ་བ་འགག་པའི་ཚེ།།
ལུས་ཀྱི་ཕྱག་རྒྱས་གདུང་སེམས་སྟོན་ལགས་ན།།
པི་ཝང་རྒྱུད་སྟོང་ཅན་གྱི་ལྷ་མོ་དེས།།
བདག་ལ་སྙན་ངག་སྩོལ་ལམ་དབྱངས་ཅན་མ།།

རབ་མེད་འཁོར་བའི་ཆུ་བོ་བྲུགས་པའི་ཚེ།།
སྡུག་བསྔལ་གཅོང་རོང་ཟབ་མོར་ཚུད་ལགས་ན།།
པད་དཀར་ཕྱག་མཚན་ཅན་གྱི་ལྷ་མོ་དེས།།
བདག་ལ་སེམས་གསོ་ཨེ་མཛད་དབྱངས་ཅན་མ།།

གྲོགས་ཀྱི་ཕྱི་ཐག་བསྟུངས་ཤིང་ཁྲེལ་གཞུང་དབེན།།
ཡིད་རྟོན་ཉམས་ཉེས་ཆེན་པོར་འཕྲད་ལགས་ན།།
བརྩེ་ཞེན་ལྕགས་ཀྱུ་འཛིན་པའི་ལྷ་མོ་དེས།།
བདག་ལ་སྙིང་གཏམ་ཨེ་གསུང་དབྱངས་ཅན་མ།།

མི་སེམས་གཡོ་དང་སྒྱུ་ཡིས་བྲིད་བྱས་ནས།།
སྙན་ངག་སྣང་བ་མོག་པོར་བྱས་ལགས་ན།།
གཉུག་སེམས་རང་ཞལ་སྟོན་པའི་ལྷ་མོ་དེས།།
སྒྲིབ་མེད་སེམས་ངོ་ཨེ་སྟོན་དབྱངས་ཅན་མ།

དུས་ཀྱི་འགྱུར་བ་མེ་ལྕེ་རླབས་ཕྲེང་གིས།།
མི་གཤིས་བུད་ཤིང་སྐད་ཅིག་སྲེག་ཉེ་ན།།
ཞི་དུལ་གོས་དཀར་ཀླུབ་པའི་ལྷ་མོ་དེས།།
ཉེན་ཁའི་གཡང་ལས་ཨེ་སྐྱོབས་དབྱངས་ཅན་མ།།

སྣ་ཚོགས་ཤེས་རིག་ཧ་ལའི་དུག་ཆེན་གྱིས།།
ཡང་དག་ལྗོན་པའི་རྩ་བ་སྐམ་ཉེ་ན།།
བདུད་རྩིའི་བུམ་བཟང་སྣམ་པའི་ལྷ་མོ་དེས།།
བསིལ་བའི་རེག་བྱ་ཨེ་སྦྱིན་དབྱངས་ཅན་མ།།

གཞན་སྐད་ཉི་མས་གདུངས་པའི་གླང་ཆེན་ཁྱུས།།
རང་སྐད་པད་ཚལ་འཇོམས་ལ་མངོན་ཕྱོགས་ན།།
ལྗགས་ལ་བྱིན་རླབས་འཁྱིལ་བའི་ལྷ་མོ་དེས།།
སྐད་གཉིས་དངོས་གྲུབ་ཨེ་སྩོལ་དབྱངས་ཅན་མ།།

གཞན་དོན་ཡལ་བར་དོར་ནས་རང་དོན་ལ།།
བརྩོན་པའི་བློ་ཡིས་ཡོངས་སུ་བྲིད་ལགས་ན།།
བདག་གཞན་མཉམ་བརྗེར་གོམས་པའི་ལྷ་མོ་དེས།།
བྱང་སེམས་རིལ་བུ་ཨེ་གནང་དབྱངས་ཅན་མ།།

བདག་ནི་ཐ་མའི་ནང་གི་ཐ་མ་སྟེ།།
ཁྱེད་ཀྱི་མཚན་ཙམ་འབོད་པའང་བརྗེད་ལགས་ན།།
ཉེ་རིང་ཕྱོགས་ལྷུང་བྲལ་བའི་ལྷ་མོ་དེས།།
བདག་ལ་ཞལ་ངོ་གཟིགས་སམ་དབྱངས་ཅན་མ།།

ལས་ཀྱི་སྒྲིབ་པ་འདི་ཡིས་ནོན་ཆེ་བས།།
ཆོས་དོན་ཚིགས་བཅད་ཙམ་ཡང་གཟུང་དཀའ་ན།།
ཤེས་རབ་ལམ་ལམ་འབར་བའི་ལྷ་མོ་དེས།།
བདག་ལ་རིག་པ་སྩོལ་ལམ་དབྱངས་ཅན་མ།།

ཉོན་མོངས་ནགས་ཀྱི་ཞུགས་ཆེན་མཆེད་པའི་རླབས།།
དགེ་སེམས་ལྗོན་པའི་ཕུང་བོ་སྲེག་ཉེ་ན།།
སྒྲིབ་བྲལ་བདེ་ཆེན་ཕྱག་རྒྱའི་ལྷ་མོ་དེས།།
ཕྲ་རྒྱས་རྩ་བ་གཞོམས་སམ་དབྱངས་ཅན་མ།།

དཔེ་མང་བཀླགས་པས་ཤེས་རབ་འཆལ་གྱུར་ཞིང་།།
དཔེ་ངན་བལྟས་པས་ལོག་ལམ་འཁྲིད་ཉེ་ན།།
ཡང་དག་ལྟ་བར་གོམས་པའི་ལྷ་མོ་དེས།།
ལྟ་བའི་གོལ་ས་སྟོན་ནམ་དབྱངས་ཅན་མ།

འདི་ནས་སྐྱེ་བའི་ཕྲེང་བ་ཐམས་ཅད་དུ།།
ལྷ་མོ་ཁྱེད་ཀྱི་སྤྱན་གྱིས་མི་གཏོང་ཞིང་།།
ངག་གི་གདངས་ལ་ཞི་བའི་རེག་བྱ་ཅན།།
ཐོབ་པའི་སྐལ་བཟང་སྩོལ་ཅིག་དབྱངས་ཅན་མ།།


འོད་དང་ཁ་བ་ཡིན་པའི་ཙོང་ཁ་བ།

ཙོང་ཁའི་རི་ལ་སྨུག་པ་དམ་དུམ་ཆད།།
ཉི་ཟེར་བཅིབས་པའི་སྐྱེས་ཆེན་གང་དུ་འཁྲུངས།།
བྱ་ཁྱུང་རི་བོའི་དབུ་ལ་འཇའ་ཚོན་བབས།།
གསེར་གྱི་རྨུ་ཐག་ཅིག་ལ་ཨ་ཡིག་འཁྲུངས།།

གསེར་གྱི་ལོ་མ་འབུམ་ལ་བྱིན་རླབས་འཁྲུངས།།
སྐྱེས་ཆེན་གང་གི་མནལ་ལམ་འཇའ་འོད་ཟུག།
ཤར་ཕྱོགས་གངས་དང་རྫ་ཡི་ཟེ་བ་ལ།།
འོད་དང་ཁ་བ་གཉིས་ཀ་ལམ་ལམ་བབས།།

གངས་རིའི་ཐང་ལ་མེ་ཏོག་སེར་བོ་སྐྱེས།།
རྨ་ཆུའི་མདངས་ལ་གསེར་གྱི་ཞུན་མ་འདྲེས།།
བྱ་ཁྱུང་རི་ལ་སྐེ་རགས་སེར་བོ་བཅིངས།།
རྟེན་འབྲེལ་ཆོས་ཀྱི་དབྱིངས་ནས་འགྲིག་སོང་སྐད།།

དགུང་ལོ་བཅུ་དྲུག་ཁ་བ་དཀར་བོ་ཡིན།།
ཁ་བའི་མདངས་ལ་གསེར་གྱི་ཉི་འོད་འདྲེས།།
དབུས་ཀྱི་ལྷ་ལྡན་ཟེར་བའི་མཚན་ལམ་བྱུང་།།
ཆོས་ཀྱི་ཨ་ཡིག་གྲགས་པའི་རྟེན་འབྲེལ་བྱུང་།།

ཕྱིར་མི་ལྡོག་པའི་ཕྱི་མིག་གང་དུ་ཤོར།།
ཙོང་ཁའི་སྐྱེས་རི་བཤུམས་པ་ཨེ་མཐོང་ལགས།།
ཡུམ་ཆེན་སེམས་ནས་ངུས་པ་ཨེ་ཚོར་ལགས།།
ཨ་སྐྱོ་བ་ཡི་ལས་དབང་ལྕི་ལགས་སམ།།

བྱང་ཐང་བུ་ཡུག་འཚུབ་པས་གངས་རི་འགུལ།།
མནབས་བཟའ་སྲབ་སྲབ་ཡིན་པས་གྲང་ལགས་སམ།།
སྨུག་པ་བུ་ཡུག་བྱུང་བས་སྐྱས་ལམ་འགོག།
ཞབས་ཐང་བགྲོད་པ་འདི་ཡིས་ངལ་ལགས་སམ།།

རི་དང་ཆུ་ཆེན་བརྒལ་བར་དཀའ་བ་ཡོད།།
ཨ་ཆེན་གངས་ལ་སྐྱོ་བ་བརྩེགས་མར་བབས།།
ཤན་ཐབས་འདབ་ཁ་རལ་བའི་ཨ་སྐྱོ་བའི།།
མནལ་བའི་ལམ་ལ་གླེགས་བམ་ཁྲི་སྟོང་འཁོར།།

ཉི་མའི་གྲོང་དུ་གསེར་གྱི་ཆོས་འཁོར་མཐོང་།།
གསེར་ཁྲི་དག་ཀྱང་ག་ལེར་འགུལ་བ་མཐོང་།།
གླེགས་བམ་གསེབ་ལ་ཤར་བའི་ཨ་སྐྱོ་བ།།
གངས་ཀྱི་གསེར་ཏོག་ཡིན་པའི་དབུ་ཁྱུད་བྱུང་།།

དབུས་དང་གཙང་ལ་ཞབས་ཀྱི་རི་མོ་བབས།།
ལམ་བུ་མང་བོར་འོད་ཀྱི་སེར་ཀ་བཏོད།།
གངས་ཀྱི་སྲུབས་ལ་རྟེན་འབྱུང་མེ་ཏོག་གད།།
རི་རབ་འགུལ་བའི་སྒྱུ་འཕྲུལ་གང་ནས་བྱུང་།།

གླེགས་བམ་བཅུ་བདུན་ངག་སྒོ་མཉམ་དུ་ཕྱེས།།
རི་ཆེན་གཙང་ཆེན་དག་ཀྱང་ཡོམ་ཡོམ་འགུལ།།
གདན་ས་དག་ལ་སྤྲིན་རྒྱབ་ཉི་འོད་འཕྲོས།།
ཨེ་མ་གོ་ལའི་སྒང་ལ་མེ་སྟག་གད།།

ཡུམ་ཆེན་ལན་བུ་དཀར་བའི་ཉིན་ཐོ་འབྱོར།།
ཕ་ཡུལ་གཙང་བོ་བཞུར་བའི་ཤག་སྒྲ་ཐོས།།
གདུང་བ་ཞིག་དང་བརྩེ་བ་ངང་གིས་འཁོར།།
སེམས་དཔའ་ཆེན་པོ་ཁྱེད་ཉིད་ངལ་ལགས་སམ།།

ཡུམ་ཆེན་དྲན་པའི་སྤྱན་ཆབ་ཐུགས་ཀྱིས་མཆོད།།
རླབས་ཆེན་ཐུགས་བསྐྱེད་ཁ་བའི་མདངས་ཀྱིས་འཕྲོས།།
རྒྱལ་སྲས་སེམས་དཔའ་ཆེན་པོའི་སྙིང་སྟོབས་ཀྱིས།།
ཆིབས་ཁ་ཡང་བསྐྱར་དགའ་ལྡན་རི་ལ་བསྐོར།།

དགའ་ལྡན་རི་ལ་ཉི་ཟླ་སྟོང་ཕྲག་ཤར།།
རྟེན་འབྱུང་རིགས་པའི་མེ་ཏོག་སླར་ཡང་སྐྱེས།།
སྔར་མེད་དབུ་མའི་སྒྲོན་མེ་འོད་ཀྱིས་སྤར།།
ཤར་གྱི་གངས་རི་ཁྱེད་ཉིད་ད་དུང་དྲན།།
དགའ་ལྡན་ལྔ་མཆོད་ཉིན།
ལྟ་མགུར་དབེན་པའི་རྒྱང་གླུ།

འདི་ནས་ནུབ་ཀྱི་ནགས་མའི་ཚལ་ཆེན་ན།།
ཤིང་གི་ལོ་མས་རྟེན་འབྲེལ་མགུར་དུ་ལེན།།
ཆུ་ཡི་ཐིག་པས་སྙིང་རྗེ་བསིལ་བ་གཏོར།།
འོད་ཀྱི་དབུས་ལ་ཞི་བའི་ཕྱག་རྒྱ་འཛུམ།།

སྣང་ཡང་སྟོང་བའི་མི་བསླུའི་རྟེན་འབྲེལ་དང་།།
སྟོང་ཡང་སྣང་བའི་རྒྱུ་འབྲས་གཤིས་ལུགས་སོགས།།
སེམས་ཉིད་ནམ་མཁའ་ཡངས་པོ་གསལ་ལེར་འཆད།།
གཉིས་སྣང་ནུབ་པའི་གད་མོ་ལྷུག་ལྷུག་དགོད།།

སེམས་ཀྱི་སྨུག་པ་དྭངས་པའི་ཕ་རོལ་ན།།
ཆོས་ཉིད་དོན་གྱི་རྒྱལ་བོ་ཁྲི་ལ་བཞུགས།།
སྣང་བས་སྣང་བ་རྩོད་པའི་འཇིག་རྟེན་འདིར།།
གཉུག་མའི་ཟླ་ཞལ་མཐོང་བ་སུ་ཞིག་ཡོད།།

སྔ་དྲོ་སྐྱིད་སྐྱིད་འདྲ་བའི་སྣང་བ་དང་།།
ཕྱི་དྲོ་སྡུག་སྡུག་ཡིན་པའི་སྣང་བ་གཉིས།།
ཐ་སྙད་གཅིག་གི་བློ་ལ་ཇི་ལྟར་འཐད།།
ཚད་མ་གཅིག་གི་ཡུལ་ལ་ཇི་ལྟར་འཇོག།

དམར་ཟས་བཟའ་རུང་རྒྱལ་བའི་ལུང་གིས་སྒྲུབ།།
མི་རུང་ཚུལ་ཡང་རྒྱལ་བའི་བཀའ་ཡིས་སྒྲུབ།།
ཐ་སྙད་ལྕགས་རི་གཏོར་བའི་ཕ་རོལ་ན།།
རུང་དང་མི་རུང་རྣམ་གཞག་ཨེ་ཡོད་ན།།

རུང་དང་མི་རུང་ཚོར་བ་རྩོད་ཚུལ་དང་།།
དགེ་དང་མི་དགེ་འདུ་ཤེས་རྩོད་ཚུལ་གཉིས།།
ཟོ་ཆུན་འཁོར་ལོ་བཞིན་དུ་བརྒྱུད་མར་འཁོར།།

ཐ་སྙད་རླུང་གིས་ཁྱེར་ན་ཅི་ཞིག་བྱ།།


གསལ་བཤད།  
གཟའ་འཁོར་རེའི་ནང་དུ་གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བར་ཆེད་དུ་སློབ་གླིང་འདིའི་མཐར་ཕྱིན་ཕུལ་བྱུང་ཡོན་ཏན་པ་དང་རྩོམ་འབྲི་བ་རེ་འོས་སྦྱོར་བྱེད་འཆར་ཡོད་པས། མཐར་ཕྱིན་འཛིན་གྲྭ་སོ་སོའི་ཕུལ་བྱུང་སློབ་མ་དག་སློབ་ཚོགས་གཞུང་ལས་ཁང་དུ་འོས་སྦྱོར་གནང་རོགས་ཞུ།  སློབ་ཚོགས་གཞུང་ལས་ཁང་གི་ཁ་པར་ཨང་གྲངས།  (0975) 838 9857    སྐད་འཕྲིན། 15109745084

གཙོ་སྒྲུབ་ལས་ཁུངས།  གངས་ལྗོངས་ཤེས་རིག་ནོར་བུའི་སློབ་གླིང་གི་ཐོན་མིའི་སློབ་ཚོགས་གཞུང་ལས་ཁང་།  



སྤྱིའི་ལྟ་སྐུལ་བ། སློབ་གྲྭའི་དབུ་བཞུགས་ལྷན་ཚོགས།
གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ།
ཞིབ་དཔྱད་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ།
རྩོམ་སྒྲིག་པ། འབའ་སྣང་གྲོལ། བསོད་ནམས་རབ་སྣང་། འཕྲིན་ལས་ཉི་མ། བན་ཤུལ་འཇམ་དབྱངས་ཡེ་ཤེས། དམ་ཆོས་ཕུན་ཚོགས།

འདྲེན་བཀོལ:
61.4K

  དཔྱད་གཏམ ( 2 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། rohu བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
  རྭ་རྒྱའི་མཐར་ཕྱིན་རྩོམ་པ་བོ་འོས་སྦྱོར། (བཞི་བ) རྟ་ནག་སྐལ་བཟང་ལུང་རིགས།   སྤེལ་མཁན།: ཚེ་དབང་རིག་འཛིན། སྤེལ་དུས:2022/6/24
མི་སྐྱའི་ནང་ན་ཁོང་འདྲ་བའི་སློབ་གཉེར་བ་དཀོན། ངོ་མཚར་ཆེའོ།།
  རྭ་རྒྱའི་མཐར་ཕྱིན་རྩོམ་པ་བོ་འོས་སྦྱོར། (བཞི་བ) རྟ་ནག་སྐལ་བཟང་ལུང་རིགས།   སྤེལ་མཁན།: ཚེ་དབང་རིག་འཛིན། སྤེལ་དུས:2022/6/24
མི་སྐྱའི་ནང་ན་ཁོང་འདྲ་བའི་སློབ་གཉེར་བ་དཀོན། ངོ་མཚར་ཆེའོ།།
  པར་ངོས1/1 པར་ཡོད།
ལྟ་ཀློག་གྲངས་ཀ
11316080
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།