སློབ་མ་སྐྱོང་བའི་མན་ངག་རིག་པའི་ཉིང་བཅུད་ཅེས་བྱ་བ།
  ཤེས་རིག་ནོར་བུའི་སློབ་གླིང་གིས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2022 ལོའི་ཟླ 5 ཚེས 18 རེས་གཟའ་ལྷག་པ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» རྩོམ་རིག» བཅད་རྩོམ། »སློབ་མ་སྐྱོང་བའི་མན་ངག་རིག་པའི་ཉིང་བཅུད་ཅེས་བྱ་བ།
སློབ་མ་སྐྱོང་བའི་མན་ངག་རིག་པའི་ཉིང་བཅུད་ཅེས་བྱ་བ།
རྩོམ་སྒྲིག་པ།  འབའ་སྣང་གྲོལ། སྤེལ་དུས 2022-05-09ལྟ་ཀློག (392)རྩོམ་ཁུངས: ངེད་དྲ་བ།པར་འདེབ།

སློབ་མ་སྐྱོང་བའི་མན་ངག་རིག་པའི་ཉིང་བཅུད་ཅེས་བྱ་བ།

               ཤེས་རབ་བསྟན་དར།

ལུས་ངག་ཡིད་ཀྱི་བྱིན་རླབས་སྒོ།།

འདི་ཕྱི་གཉིས་ཀྱི་ཕན་བདེའི་གཞི།།

སངས་རྒྱས་ལས་ལྷག་བཀའ་དྲིན་ཅན།།

བླ་མ་རྣམས་ལ་གུས་པས་འདུད།།

 

ཆོས་སྲིད་ལེགས་ཚོགས་འཕེལ་བའི་གཞི།།

ཆོས་དང་འཇིག་རྟེན་གཉིས་ཀྱི་ལམ།།

སྐྱེས་བུ་དམ་པ་རྣམས་ཀྱི་སྲོག།

ཐོས་པ་ཡིན་གྱི་གཞན་ན་གང་།།

 

རྫོགས་པའི་སངས་རྒྱས་ཐམས་ཅད་ཀྱང་།།

སློབ་མ་སྐྱོང་ཕྱིར་བྱོན་པ་སྟེ།།

ཉན་ཐོས་རང་རྒྱལ་བྱང་སེམས་ཀྱང་།།

བླ་མར་བསྟེན་ལས་བྱུང་བ་ཡིན།།

 

བཤེས་ལ་བསྟེན་པ་བསྟེན་པའི་མཆོག།

སློབ་མ་སྐྱོང་བ་ལས་ཀྱི་མཆོག།

སློབ་གཉེར་བྱེད་པ་བྱ་བའི་མཆོག།

སེམས་ལ་ཕན་པ་ཆོས་ཀྱི་མཆོག།

 

སློབ་མ་སྐྱོང་བར་འདོད་པ་ལ།།

ཚུལ་དང་མཐུན་པའི་སྤྱོད་པ་གཙོ།།

དྲི་མ་མེད་པའི་རྣམ་དཔྱོད་གཙོ།།

སླད་དང་བྲལ་བའི་ལྷག་བསམ་གཙོ།།

 

ཕྱོགས་རིས་མེད་པར་ཀུན་ལ་བྱམས།།

ཉེ་རིང་མེད་པར་ཕན་སེམས་བསྐྱེད།།

ངལ་བ་མེད་པར་ཡང་ཡང་འཆད།།

དེ་ལ་སློབ་མ་དམ་པ་འབྱུང་།།།

 

དང་བོར་སློབ་མའི་སྤོབས་པ་བསྐྱེད།།

བར་དུ་སློབ་མའི་བརྩོན་པ་བསྐྱེད།།

ཐ་མར་སློབ་མའི་ཀུན་སྤྱོད་བསྐྱེད།།

ཀུན་ཏུ་སློབ་མའི་བློ་གྲོས་བསྐྱེད།།

 

རྒྱུས་མེད་སློབ་མ་སྐྱོང་བ་དེ།།

སྨུག་པའི་ནང་དུ་གླུ་ལེན་འདྲ།།

སློབ་མ་བོར་ནས་སྐྱོང་བ་དེ།།

མུན་པའི་ནང་ནས་རྡོ་འཕེན་འདྲ།།

 

སློབ་མར་དམན་ཡང་བསྟོད་པ་དགོས།།

སློབ་མ་བཟང་ཡང་སྐུལ་བ་དགོས།།

མཆོག་དམན་ཀུན་ལ་སྙིང་རུས་དབལ།།

རྡོ་ལ་ཨི་ཁུང་འབིག་འདྲ་དགོས།།

 

བྱམས་པའི་སྐྱོང་བའི་ཞི་བ་དགོས།།

བག་མེད་གཅུན་པའི་དྲག་པོ་དགོས།།

ཞི་དྲག་ཐབས་ལམ་གང་ལ་འང་།།

སློབ་མར་ཕན་འདོད་བསམ་པ་དགོས།།

 

སློབ་མར་ལོག་པའི་ལམ་སྟོན་པ།།

མཛོ་སྦྲེལ་གཡང་ཁར་འགྲིམ་པ་འདྲ།།

སློབ་མར་དགེ་བའི་འཁྲིད་པ་གང་།།

ཐར་བའི་རྒྱལ་མཚན་འཛུགས་པ་འདྲ།།

 

ལ་ལར་བསྟོད་པས་བག་མེད་བྱུང་།།

ལ་ལར་སྨད་པས་ཡིད་སེམས་ཕམ།།

སློབ་མའི་ཁམས་དང་སེམས་པ་བཞིན།།

གང་ལ་གང་འདུལ་ཐབས་དེ་གཅེས།།

 

འཆད་བྱའི་གཞུང་ལ་བརྩོན་པ་བསྟེན།།

བརྩོན་པ་ཅན་གྱིས་ལས་ཀུན་འགྲུབ།།

སློབ་མ་རྣམས་ལ་ལྷག་བསམ་བསྐྱེད།།

ལྷག་བསམ་ཅན་གྱིས་གཞན་དོན་འགྲུབ།།

 

མི་ཤེས་འོལ་ཚོད་ཀྱིས་འཆད་པ།།

སྨྱོན་པས་རལ་གྲི་གཡུག་པ་འདྲ།།

དཀའ་གནད་ཐེ་ཚོམ་གྱིས་འཆད་པ།།

བྱིས་པ་ཐང་སྟོང་འཁྱམས་པ་འདྲ།།

 

དཀའ་ས་བསྐྱུར་ནས་འཆད་པ་གང་།།

སོ་མེད་རྒན་པོས་ཟོས་པ་འདྲ།།

སླ་ས་དགོས་མེད་སྤྲོས་པ་ནི།།

རྒན་མོ་ཁོམ་པའི་ཁ་བརྡ་འདྲ།།

 

གནད་ལ་མི་འབྱོར་འབྲེལ་མེད་པ།།

ཟང་ཟིང་བྱ་རོག་ཚང་དང་འདྲ།།

ཉན་པའི་རྒྱུད་ཚོད་མི་བསྟུན་པ།།

གླེན་མས་བུ་ཆུང་གསོ་བ་འདྲ།།

 

གང་ཤེས་སྤྲོས་ཏེ་འཆད་པ་ནི།།

དགོས་མེད་འབྲུག་སྟོང་སྒྲོག་པ་འདྲ།།

ཤེས་ཀྱང་གསལ་བོ་མི་འཆད་པ།།

གཡོ་སྒྱུ་ཅན་གྱི་ཚོང་བ་འདྲ།།

 

གནའ་བོའི་གཏམ་གྱིས་སྤྲོ་བ་སངས༎

སྤྲོ་བས་སློབ་མའི་རིག་པ་སངས༎

ཉམས་མཚར་གཏམ་གྱིས་དགའ་བ་བསྐྱེད༎

དགའ་བས་སློབ་མའི་སྤྲོ་བ་བསྐྱེད༎

 

ཚིག་དོན་མདུད་པ་བཀྲོལ་བས་གསལ༎

བརྗོད་བྱ་ཐེངས་འགའ་བཤད་ན་གསལ༎

གནད་དག་དཔེ་ཡིས་སྤྲོས་ན་གསལ༎

དཀའ་བ་ཡང་ཡང་འདྲིས་ན་གསལ༎

 

མུ་བཞིས་གསལ་བའི་རིག་པ་བསྐྱེད༎

དཔྱོད་པས་མྱུར་བའི་རིག་པ་བསྐྱེད༎

ཁྱབ་མཐའི་གསལ་བའི་རིག་པ་བསྐྱེད༎

སྣ་ཚོགས་ཐབས་ཀྱིས་རིག་པ་བསྐྱེད༎

 

ཚིག་འཁྲི་བྱང་བས་རིག་པ་མྱུར༎

རྩ་འགྲེལ་སྦྱར་བས་གོ་བ་བསྐྱེད༎

བློ་ལ་བཟུང་བས་འདྲིས་ཆ་ཡོང་༎

ཡང་ཡང་བརྩད་པས་བྱང་ཆར་འགྲོ༎

 

དྲི་བས་སློབ་མའི་རྒྱུད་ཚོད་ཤེས༎

སློབ་མས་དྲི་བས་དཀའ་གནད་རྙེད༎

དགེ་སློབ་དྲི་བ་དྲིས་ལན་གྱིས༎

བསླབ་བྱའི་ཕྱི་ནང་མཐའ་དག་ཤེས༎

 

སྒྲ་རིག་གཞུང་དོན་གོ་སླད་འཁྲིད།།

ཚད་མ་རིགས་པ་བསྐྱེད་ཕྱིར་འཁྲིད།།

ནང་བསྟན་སེམས་པ་ཕན་ཕྱིར་འཁྲིད།།

བཟོ་གསོ་གཞན་རྗེས་འཛིན་ཕྱིར་འཁྲིད།།

 

མཚན་ཉིད་དགག་སྒྲུབ་སྤྲོས་ཏེ་འཆད།།

གཞུང་ཆེན་རྩ་འགྲེལ་སྦྱར་ནས་འཆད།།

ལམ་རིམ་ཉམས་ལེན་སྦྱར་ཏེ་འཆད།།

བློ་སྦྱོང་ནང་ལ་བསྐོར་ནས་འཆད།།།

 

མདོ་སྡེ་ཕུན་ཚོགས་ལྔ་ཡིས་འཆད།།

རྒྱུད་སྡེས་མཐའ་དྲུག་ཚུལ་བཞིས་འཆད།།

མདོར་ན་དམ་ཆོས་གང་འཆད་ཀྱང་།།

ཆེ་བ་གསུམ་དང་ལྡན་པས་འཆད།།

 

དཀའ་བ་སླ་བོར་འཆད་ན་མཛངས།།

སླ་བ་དཀའ་བར་འཆད་ན་གོལ།།

གང་གང་གསལ་བར་སྟོན་ནུས་པ།།

དེ་ནི་འཆད་ལ་མཁས་པ་ཡིན།།

 

དོན་དང་ལྡན་པའི་སྐད་ཆ་དཀོན།།

སེམས་ལ་ཕན་པའི་བསླབ་བྱ་དཀོན།།

བསླབ་བྱ་བསླབ་བྱར་འཛིན་པ་དཀོན།།

འཛིན་ཡང་སེམས་ལ་ཕན་པ་དཀོན།།

 

མི་ཚེར་རིག་པའི་གནས་ལ་སྦྱངས༎

ཚེ་ཕྱེད་སློབ་མར་སྐྱོང་ལ་བྲེལ༎

སྐྱོང་བའི་ཉམས་མྱོང་མི་ཤེས་ཀྱང་༎

བསམ་ཚུལ་ཙམ་ཞིག་ལྷུག་པོར་བརྗོད༎

 

འདི་ཡི་དགེ་བས་འགྲོ་བ་ཀུན།།

མཚན་ལྡན་བླ་མར་མཇལ་བ་དང་།།

ཐོས་བསམ་སྒོམ་གསུམ་ཚུལ་བཞིན་དུ།།

བྱས་ནས་དམ་ཆོས་འཛིན་པར་ཤོག།

 

སློབ་མ་སྐྱོང་བའི་མན་ངག་རིག་པའི་ཉིང་བཅུད་ཅེས་བྱ་བ་འདི་ནི་སློབ་མ་སྐྱོང་བའི་བསླབ་བྱ་ཞིག་དགོས་ཞེས་རང་གི་སློབ་བུ་སློབ་མ་བསྐྱང་འདོད་པ་ཞིག་གིས་བསྐུལ་བ་བཞིན་སློབ་མ་སྐྱོང་མི་ཤེས་པའི་སློབ་དཔོན་ཤེས་རབ་བསྟན་དར་གྱིས་རང་གི་ཡིད་ལ་དྲན་ཚོད་ཅིག་ཤར་མར་བྲིས་པའོ༎ རྩ

རྩོམ་ཁུངས།  ཤེས་རབ་གཡང་དཔེ་མཛོད་ཁང་། 


སྤྱིའི་ལྟ་སྐུལ་བ། སློབ་གྲྭའི་དབུ་བཞུགས་ལྷན་ཚོགས།
གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ།
ཞིབ་དཔྱད་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ།
རྩོམ་སྒྲིག་པ། འབའ་སྣང་གྲོལ། བསོད་ནམས་རབ་སྣང་། འཕྲིན་ལས་ཉི་མ། བན་ཤུལ་འཇམ་དབྱངས་ཡེ་ཤེས། དམ་ཆོས་ཕུན་ཚོགས།

འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། mjbp བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
10721564
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།